அமெரிக்காவில் 100 வயது ஆணும், 102 வயது பெண்ணும் திருமணம் செய்து கின்னஸ் உலக சாதனையில் இடம் பிடித்துள்ளனர்.
பெர்னி லிட்மேன்- மார்ஜோரி பிடர்மேன் என்ற இந்த தம்பதி, பிலடெல்பியாவில் உள்ள அவர்களது வீட்டில் கடந்த 3-ந் தேதி திருமணம் செய்து கொண்டனர். முதியோர் இல்லத்தில் எதேச்சையாக சந்தித்த இவர்கள், தங்களது இளமை பருவத்தில் பென்சில்வேனியா பல்கலைக்கழகத்தில் ஒன்றாக படித்ததை அறித்தனர். பெர்னி என்ஜினீயராக பணியாற்றி ஓய்வு பெற்றவர். மார்ஜோரி ஓய்வு பெற்ற ஆசிரியை ஆவார்.
இருவரும் குடும்பத்தோடு தனித்தனியாக வாழ்ந்து வந்த நிலையில், தங்களின் துணை இறந்த பிறகு பென்சில்வேனியாவுக்கு குடிபெயர்ந்தனர். முதியோர் இல்லத்தில் இருவரும் மீண்டும் சந்தித்த போது காதல் மலர்ந்துள்ளது. இதையறிந்த குடும்பத்தினர் இருவருக்கும் திருமணம் செய்து வைத்துள்ளனர்.
பெர்னி லிட்மேனின் பேத்தியான சாரா சிசெர்மேன், இருவரும் தங்கள் முதல் திருமணத்தில் அவர்களது துணைகளுடன் 60 ஆண்டுகளுக்கும் மேலாக இணைந்து வாழ்ந்த நிலையில், 100 வயதில் மீண்டும் காதலைக் கண்டுள்ளதாக சமூக ஊடகங்களில் பதிவிட்டுள்ளார். இந்த தம்பதி உலகின் மூத்த தம்பதி என கின்னஸ் புத்தகத்தில் இடம் பிடித்தனர்.